ꏃꃅꀿꃀꉙꅇ
ꁱꊿ:ꐚꃮꒌꁬ
ꀘꊿ:ꐚꑕꒈꎆ
ꁧꐙꁡꇤꇆ,ꀃꂰꑠꉔ
ꄩꆹꃅꑆꋌꁬꇬ
ꏷꌺꌕꄙꌕꉐꑓꂭꋎꇴꄹꄉꑴꌦꇆ
ꋋꆹꐩꋊꐊꄉꌒꐪꁊꌠꉪꀿꉪꃀꉬꐤꁮ
ꎭꐪꂁꄉꉙꅇꂘꅇꄜꂯꑴꌦꌠꉬꅊꇈ
ꋋꆹꊂꋊꌺꇖꎁꃅꋏꌠ
ꑠꃅꇬꊂꋊꌺꇖꒌꄂꆟꃰꐺꐛꅹ
ꇭꀧꇖꌋꀉꄂꇬꉚꇫꅲꈧꀋꐛ
ꈭꐨꆎꆹꉉꌐꈤꀋꉆꌠꉙꅇ
ꆏꄻꅽꑓꌬꀕꌠꁨꑭꐋꃅꎼꇁ
ꐧꆹꃅꌗꈬꇬꃹ
ꑠꃅꑴꇬꃅꌗꑊꑍꀊꊸꆹꐤꁮ
ꋌꐂꃅꉒꈬꇬꃹꇈ
ꏃꃅꀿꃀꉙꅇꆹꇝꀋꇬꃅꑇꇁꉒꐊꐺ
ꃅꉒꋌꎼꉌꐡꐛꅹꑓꁴꅐꐤꁮ
ꉙꅇꄡꇗꋌꁈꃅꉒꑓꁴꉐꌦꈬꇬꊐ
ꋋꆹꋋꈭꐨ
ꁧꐙꁡꇤꃅꉒꃴꐛꅹ
ꃅꃴꏷꋦꄖꌠꏃꃅꀿꃀꑓꐛꀋꇁꀐꂼ
ꀋꂮꉐꍛꌺꁍꇗꀕꃅꇁꌊꁧꐙꁡꇤꊐ
ꁍꇗꎴꇉꌠꊂꋊꌺꇖꑌꇝꀋꇬꃅꏹꇁꆺꑳꀀꈌꃹ
ꐝꍠꀕꌠꉙꅇꀉꄂꇫꍻꄉꋍꁊꇴꇈ
ꒌꄂꆟꃰꐺꌠꊂꋊꌺꇖꆹꑞꑌꀋꅲꃅꀀꃅꃹꒉꀐ
ꏃꃅꉙꅇꆹꃅꉒꑓꁴꌅꀋꄐꐛꅹ
ꃅꅍꎷꀋꊌꃅꉌꃀꎔꀕꂶꌠꌊ
ꁧꐙꁡꇤꍍꃤꋌꇈꆀꃤꉼ
ꍍꃤꆀꃤꌌꏃꃅꆈꋧꀕꅉꁧꂯ
ꀏꆹꊖꆈꀂꏽꈴ
ꏃꃅꉙꅇꃅꉒꑓꁴꐊ
ꀋꇝꃅꊖꆈꀂꏽꋍꈭꐂꑴꌦ
ꊂꋊꌺꇖꆹꀀꂼꂻꀐꐤꁮ
ꏃꃅꉙꅇꂘꅇꈽꐂꀋꆹ
ꏃꃅꀿꃀꉙꅇꁈꀋꐥꃅ
ꋍꎭꐪꅦꑌꌋꆀꁧꐙꁡꇤꍍꃤꆀꃤ
ꋌꀵꅉꃴꆈꋧꀕꅉꃹꁧꀐ
ꋌꉚꋋꅲꌠꆹꆈꃅꆸꈈꃬꀮꀉꄂꉬꅊꇈ
ꀋꂮꃬꀮꎓꄹꇴꇬꆏ
ꏃꃅꀿꃀꃬꀮꇳꃚꐊꄉꐰꁧꀐꐤꁮ
ꈭꐨꉡꑌꀀꐚꑓꄧꇁ
ꉢꆹꁧꐙꁡꇤꉜꇬꆏ
ꄩꆹꃅꑆꃴꇉꀕ
ꏷꌺꂷꑓꂿꀋꇁꀐ
ꀏꆹꁧꐙꁡꇤꀑꐈꑊꆴꌐ
ꉙꇁꂘꅇꋌꐛꋌꐙꈬꇬꃹꁧꐤꁮ
ꁧꐙꁡꇤꀑꎔꑊꎔꈭꐨ
ꊂꋊꌺꇖꇫꅲꈧꐛꇀꇁꑴꌦꂯ?
ꒌꄂꆟꃰꁦꁧꑴꌦꂯꇆ?